Bu il Azərbaycan təxminən 282 milyon kubmetr türkmən qazı idxal edib

Bu ilin yanvar-aprel aylarında Azərbaycana bəyan edilmiş qaz idxalı 281 milyon 20,67 min kubmetr təşkil edib.

“Report” bu barədə Dövlət Statistika Komitəsinin məlumatına istinadən xəbər verir, ki, bu, ötən ilin müvafiq dövrü ilə müqayisədə 76,6 % azdır.

Söhbət Azərbaycan Dövlət Gömrük Komitəsi tərəfindən qeydə alınan (bəyan edilən) həcmlərdən gedir.

Bu ilin ilk 4 ayında Azərbaycana idxal olunan qazın dəyəri ötən ilin müvafiq dövrü ilə müqayisədə 79,2 % azalaraq 42 milyon 154,8 min ABŞ dolları təşkil edib.

Statistik məlumatlara görə, hesabat dövründə qaz idxalının bütün həcmi Türkmənistandan olub. Eyni zamanda, bu dövrdə Türkmənistan qazının tədarükünün artımı kəmiyyət ifadəsində 29,5 %, dəyər ifadəsində isə 28,8 % artıb.

Qeyd edək ki, 2023-cü ildə Azərbaycana bəyan edilmiş qaz idxalı 361 milyon 997,49 min ABŞ dolları dəyərində 2 milyard 332 milyon 254,05 min kubmetr təşkil edib.