Azərbaycandan Serbiyaya tədarük edilən qazın həcmi açıqlanıb

Bu ilin əvvəlindən Azərbaycan Serbiyaya 26 milyon kubmetrdən çox təbii qaz ixrac edib.

Bu barədə “Report”a Dövlət Statistika Komitəsindən məlumat verilib.

Azərbaycan qazının Serbiyaya tədarükü 2024-cü ilin fevralında başlayıb.

Bu ilin fevral-iyul ayları ərzində Serbiyaya 9 milyon 125,4 min ABŞ dolları dəyərində 26 milyon 36,22 min kubmetr qaz tədarük edilib.

Statistikaya görə, təkcə iyul ayında Azərbaycan Serbiyaya 1 milyon 129,58 min ABŞ dolları dəyərində 3 milyon 023,3 min kubmetr qaz ixrac edib.

Söhbət Azərbaycan Dövlət Gömrük Komitəsi tərəfindən qeydə alınan (bəyan olunan) həcmlərdən gedir.

Xatırladaq ki, 2023-cü il noyabrın 15-də Azərbaycan Dövlət Neft Şirkəti (SOCAR) və “Srbijagas” şirkəti arasında 2024-cü ildən başlayaraq Azərbaycan qazının Serbiyaya tədarükü ilə bağlı müqavilə imzalanıb. Müqavilə 2024-2026-cı illərdə bu ölkəyə 400 milyon kubmetrə qədər Azərbaycan qazının tədarükünü nəzərdə tutur və 2027-ci ildən etibarən bu həcm artırıla bilər.