Vaşinqton Tayvana hərbi yardım ayıracaq

Rəsmi Vaşinqton Tayvana 345 milyon dollara qədər hərbi yardım ayıracaq.

“Report”un məlumatına görə, bu barədə ABŞ Prezidenti Cozef Baydenin adından yayılan bəyanatda deyilir.

Qeyd olunub ki, bununla bağlı Amerika lideri Dövlət Katibinə göstəriş verib.

“ABC” kanalının mənbələrə istinadən verdiyi məlumata görə, hərbi yardım ABŞ Müdafiə Nazirliyinin ehtiyatlarından ayrılacaq, paketə daşına bilən hava hücumundan müdafiə sistemləri, odlu silahlar, raketlər, kəşfiyyat və müşahidə avadanlıqları daxil olacaq.

Kanal qeyd edib ki, Bayden administrasiyası ilk dəfə olaraq müdafiə ehtiyatlarından adaya böyük bir hərbi yardım paketi ayırmaq qərarına gəlib.