Stefançuk: Ali Rada müdafiə qabiliyyətini gücləndirmək üçün operativ qərarlar qəbul etməyə hazırdır

Ukrayna Ali Radası dövlətin müdafiə qabiliyyətini gücləndirmək üçün zəruri qanunvericilik qərarlarının qəbulunu operativ şəkildə təmin etməyə hazırdır.

"Report" xəbər verir ki, bu barədə Ali Radanın sədri Ruslan Stefançuk Ukraynanın təhlükəsizlik və müdafiə sektorunun rəhbərliyi ilə işgüzar görüşdən sonra "Facebook"da yazıb.

Onun sözlərinə görə, müşavirədə müdafiə naziri vəzifəsini icra edən Yevgeni Xmara, Ukrayna Silahlı Qüvvələrinin Baş Qərargah rəisi İqor Skibyuk və Milli Təhlükəsizlik və Müdafiə Şurasının katibi İqor Klimenko iştirak ediblər.

Stefançuk qeyd edib ki, Müdafiə Qüvvələrinin maliyyələşdirilməsi prioritetdir.

"Müdafiə Qüvvələrinin maliyyələşdirilməsi mütləq prioritet olaraq qalır. Parlament dövlətin müdafiə qabiliyyətini gücləndirmək üçün zəruri qanunvericilik qərarlarını operativ şəkildə təmin etməyə hazırdır", - o yazıb.

Parlament spikerinin sözlərinə görə, görüş iştirakçıları həmçinin hökumətin fəaliyyət proqramının formalaşdırılması üzrə Müdafiə Nazirliyinin təkliflərini, birgə səylərin əlaqələndirilməsini və Ali Radanın rəhbərliyi, müvafiq komitələr və xalq deputatları ilə qarşılıqlı fəaliyyətin gücləndirilməsini müzakirə ediblər.

Bundan əlavə, tərəflər təhlükəsizlik və müdafiə sahəsində qanunvericilik bazasının təkmilləşdirilməsi məsələlərini nəzərdən keçiriblər.