Serbiya Prezidenti: Əminəm ki, parlament seçkiləri demokratik keçiriləcək

Serbiyada keçiriləcək parlament seçkiləri demokratik olacaq.

"Report"un Balkan bürosu xəbər verir ki, bunu Serbiya Prezidenti Aleksandar Vuçiç "TV Pink"ə müsahibəsində deyib.

Dövlət başçısı qeyd edib ki, seçkilər ya iyulun 12-də, ya da oktyabr-noyabr aylarında keçiriləcək.

"Ölkədə və dünyadakı vəziyyətdən asılı olaraq dövlət maraqlarını rəhbər tutacağıq. Əminəm ki, seçkilər demokratik olacaq. ATƏT-in Demokratik Təsisatlar və İnsan Haqları Bürosunun (DTİHB) tövsiyələri tam şəkildə qəbul ediləcək, həmçinin məhkəmə sistemi ilə bağlı Venesiya Komissiyasının qərarları da həyata keçiriləcək", - Vuçiç qeyd edib.

Prezident vurğulayıb ki, hər şey xalqın istədiyi kimi olacaq: "Xalq nə düşündüyünü və hansı gələcəyi istədiyini demək imkanı əldə edəcək. Keçmişə qayıdışmı istəyirlər, boşaldılmış zavodlara, iş yerlərinin itirilməsinə, talançı özəlləşdirməyə, 2000-2012-ci illərdə olduğu kimi ərazilərin itirilməsinəmi qayıtmaq istəyirlər, yoxsa inkişaf və rifah yolunu davam etdirməyi? Düşünürəm ki, insanların qarşısında seçim kifayət qədər aydın olacaq".