Pakistan məhkəməsi keçmiş Baş nazirin həbsi ilə bağlı orderin icrasını dayandırıb

Pakistan məhkəməsi ölkənin keçmiş Baş naziri Nəvaz Şərifin həbsi ilə bağlı orderin icrasını dayandırıb.

“Report” xəbər verir ki, bu barədə “Aaj News” telekanalı məlumat yayıb.

Qeyd edək ki, 2017-ci ilin oktyabrında Pakistan məhkəməsi antikorrupsiya işi bağlı dinləmələrə gəlmədiyi üçün keçmiş baş nazir Nəvaz Şərif barəsində həbs qətimkan tədbiri seçmişdi.

Xatırladaq ki, həmin il oktyabrın 19-da Pakistan məhkəməsi keçmiş Baş nazir Nəvaz Şərifə, qızı Məryəm Nəvaza və kürəkəni Məhəmməd Safdara qarşı korrupsiya ittihamı irəli sürmüşdü. Onlar bu ittihamlarla bağlı özlərini təqsirli bilməyib.

Nəvaz Şərif 3 dəfə (1990-1993, 1997-1999, 2013--2017-ci illərdə) Pakistanın Baş naziri olub. 2017-ci il iyulun 28-də Pakistan Ali Məhkəməsi onun barəsində vəzifəsinə uyğun gəlməməsi ilə bağlı qərar qəbul edib. Bundan sonra Nəvaz Şərif istefa verib.