"Mançester Siti" Buaddini 129 milyon avroya "Lill"dən alır

"Mançester Siti" və Fransa təmsilçisi "Lill" arasında Mərakeş millisinin 18 yaşlı yarımmüdafiəçisi Ayub Buaddinin transferi ilə bağlı prinsipial razılıq əldə edilib.

"Report" xəbər verir ki, bu barədə insayder Devid Ornşteyn X sosial şəbəkəsində məlumat yayıb.

Mənbənin məlumatına görə, transfer məbləği 129 milyon avro təşkil edəcək, daha 6 milyon avro bonuslar nəzərdə tutulub. Futbolçunun özü də keçiddə maraqlıdır və sövdələşmə yekun mərhələdədir.

Daha əvvəl Buaddinin İngiltərə klubu ilə beşillik müqavilə barədə razılığa gəldiyi bildirilmişdi.

Yarımmüdafiəçi ötən mövsüm klub səviyyəsində bütün turnirlərdə 42 matç keçirib və bir məhsuldar ötürmə edib. Onun "Lill"lə hazırkı müqaviləsi 2029-cu ilin yayına qədər qüvvədədir.