İsrail ordusu Livanın cənub sakinlərini yenidən təxliyə olmağa çağırıb

İsrail Müdafiə Qüvvələri (IDF) yenidən Livanın cənub sakinlərini "Hizbullah"a qarşı döyüş əməliyyatları ilə əlaqədar şimala təxliyə olmağa çağırıb.

"Report" xəbər verir ki, bu barədə İsrail KİV-i ordu nümayəndəsi polkovnik Avixay Adraiyə istinadən məlumat yayıb.

"Livanın cənub rayonlarının sakinlərinə təcili xəbərdarlıq: siz dərhal Litani çayından şimala doğru hərəkət etməyə davam etməlisiniz. Bir daha vurğulayırıq ki, xəbərdarlıq Tir və Bint-Cübeyl şəhərlərinin sakinlərinə də aiddir", - o bildirib.

İsrail tərəfinin qiymətləndirmələrinə görə, indiyə qədər Livanın cənubundakı kəndlərdən 300 mindən çox livanlı dinc sakin təxliyə olunub.

İsrail Müdafiə Qüvvələrinin hesablamalarına görə, 2024-cü ildə İsrail və "Hizbullah" arasında hərbi əməliyyatlar zamanı təxminən 1,2 milyon livanlı evlərini tərk edib.