İran Avstriyanın vitse-prezident Eslami üçün viza verməməsinə etiraz edib

İran Xarici İşlər Nazirliyi (XİN) Avstriyanın Tehrandakı diplomatik missiyasının rəhbərini çağıraraq Vyananın İranın vitse-prezidenti və Atom Enerjisi Təşkilatının rəhbəri Məhəmməd Eslamiyə viza verməkdən imtina etməsinə görə qəti etirazını bildirib.

"Report" İran mediasına istinadən xəbər verir ki, bu barədə İran XİN-in nümayəndəsi İsmayıl Bəqai məlumat verib.

Məhəmməd Eslami Vyanada keçiriləcək Atom Enerjisi üzrə Beynəlxalq Agentliyin Baş Konfransının 70-ci sessiyasında iştirak etməli idi.

"Onlar bütün beynəlxalq qanunlara əsasən İran nümayəndə heyətinə viza verməli idilər. Biz dərhal tədbir gördük, etirazımızı bildirmək üçün Avstriyanın müvəqqəti işlər vəkilini çağırdıq", - o, həftəlik mətbuat konfransı zamanı bildirib.

Bəqainin sözlərinə görə, Vyananın Vaşinqtonun təzyiqi altında viza verməkdən imtina etməsi faktı Avstriyanı bu hərəkətinə görə məsuliyyətdən azad etmir.