Ərdoğan və Putin ikitərəfli sammitin keçirilməsi barədə razılığa gəlib

Bakı. 16 noyabr. REPORT.AZ/ Rusiya-Türkiyə Yüksək Səviyyəli Əməkdaşlıq Şurası dekabrın 15-də Rusiyada keçiriləcək. "Report" "RİA Novosti"yə istinadən xəbər verir ki, bu barədə iki ölkənin prezidenti Vladimir Putin və Rəcəb Tayyib Ərdoğanın Antalyada G20 liderlərinin sammiti çərçivəsində keçirdikləri ikitərəfli görüş zamanı razılıq əldə olunub.

İki ölkə liderinin görüşü Bələk qəsəbəsindəki "Reqnum" hotelində bağlı qapılar arxasında baş tutub və təqribən bir saat davam edib. Görüşdə, həmçinin Rusiya tərəfdən xarici işlər naziri Sergey Lavrov, Türkiyə tərəfdən isə xarici işlər naziri Feridun Sinirlioğlu, energetika naziri Əli Rza Alaboyun və Türkiyə Kəşfiyyat İdarəsinin rəhbəri Hakan Fidan iştirak edib.