Sorğu: Almaniyanın hakim koalisiyasının reytinqi ən aşağı səviyyəyə düşüb

Almaniyanın Xristian Demokrat İttifaqı, Xristian Sosial İttifaqı (XDİ/XSİ) və Sosial Demokrat Partiyasından (SDP) ibarət hakim koalisiyasının təsdiq reytinqi mayın 6-da hakimiyyətə gəldikdən bəri ən aşağı səviyyəyə çatıb.

"Report"un məlumatına görə, bu, INSA sorğu institutunun "Bild am Sonntag" qəzetinin sifarişi ilə keçirdiyi sorğuda məlum olub.

XDİ/XSİ-nin dəstək səviyyəsi ötən həftədən bir faiz bəndi azalaraq 24 %-ə çatıb. Bu, mühafizəkarların son altı ayda əldə etdiyi ən pis nəticədir. Sosial demokratlar da bir faiz bəndi itirərək seçicilərin cəmi 14 %-nin dəstəyini qazanıb. Bu o deməkdir ki, XDİ/XSİ və SDP koalisiyası may ayında hakimiyyətə gəldikdən bəri ən aşağı səviyyəni cəmi 38 % əldə edib.

"XDİ/XSİ və SDP cəmi 38 % səs toplayıb və parlament çoxluğundan 6 faiz bəndi uzaqdadır", - INSA-nın direktoru Herman Binkert nəticələri şərh edib. "23 fevral 2025-ci ildə keçirilən federal seçkilərin nəticələri ilə müqayisədə, XDİ/XSİ və SDP birlikdə 7 faiz bəndi itirdi - təxminən hər altı seçicidən biri", - o vurğulayıb.

Populyarlıq reytinqinə 26% səslə ifrat sağçı Almaniya üçün Alternativ (AfD) başçılıq edir (dəyişməyib). Sol Partiya öz göstəricilərini 1 faiz bəndi yaxşılaşdırıb və hazırda 12 % səviyyəsindədir, "Yaşıllar"ı 11 % (1 faiz bəndi aşağı) qabaqlayır.

Qalan partiyalar Bundestaqa daxil olmaq üçün tələb olunan 5 %-lik baryeri keçə bilməyiblər. Bu o deməkdir ki, 44 % və ya daha çox səslə parlament çoxluğu əldə edilir.

Sorğu sentyabrın 29-dan oktyabrın 2-dək aparılıb, 1 186 nəfər iştirak edib.