İƏT Qarabağ həqiqətlərinin dünyaya çatdırılmasında mühüm rol oynayıb - RƏY

Azərbaycan daim islam dövlətlərinin müxtəlif birliklərinə, qurumlarına xoş münasibət göstərib və onlara üzv olmağa çalışıb.

Bunu "Report"a açıqlamasında Vətəndaş Həmrəyliyi Partiyasının (VHP) sədri, Xalq şairi Sabir Rüstəmxanlı deyib.

O bildirib ki, Azərbaycan SSRİ dağıldıqdan sonra İslam Konfransı Təşkilatına (İƏT) qoşulan ilk ölkələrdən idi:

"İslam Konfransı Təşkilatı və İslam Əməkdaşlıq Təşkilatı ilə Azərbaycanın uzun sürən və müxtəlif mərhələlərdən keçən bir əməkdaşlığı olub. Mən uzun müddət bu təşkilatlarda təmsil olunmuşam. Bir müddət İƏT, İKT-yə üzv ölkələrin mətbuat və informasiya nazirlərinin 1992-1995-ci illərdə görüşlərində, Misir və Suriyada keçirilən toplantılarda iştirak eləmişəm. Bu əməkdaşlığın müxtəlif məsələlərini izləmişəm. Xatırlayıram ki, İslam Konfransı Təşkilatının mətbuat nazirlərinin Suriyadakı görüşündə Qarabağ sözünü qətnaməyə saldırmaq üçün 4 dəfə çıxış eləmişəm. Azərbaycanın Qarabağ məsələsini Kəşmir, Bosniya, Şimali Kipr Cümhuriyyəti ilə bir sıraya salmaq istəyirdilər. Mən orada sübut elədim ki, bu tamam ayrıdır və bu məsələdə İKT sədrinin dəstəyi oldu. Həmin iclasda Qarabağ məsələsini ayrı bir cümlədə yazdırmağa nail olduq".

S.Rüstəmxanlı qeyd edib ki, sonralar Azərbaycana münasibət nisbətən dərinləşib:

"Toplantıların birində Qarabağla bağlı 28 maddədən ibarət qətnamə qəbul olunmuşdu. Bu, Azərbaycanı dəstəkləyən bir qətnamə idi. Amma ilk vaxtlarda İslam Əməkdaşlıq Təşkilatında hələ münaqişənin mahiyyəti barədə xəbərsiz idilər. Ermənistanın işğalçı olduğunu, Azərbaycanın torpaqlarının işğal olunduğunu bir sıra ölkələr qəbul etmirdilər. Təbii ki, bunların arasında Ermənistanla əlaqəsi olan ölkələr də var. Tədricən Azərbaycanın mövqeyi möhkəmləndi".

Xalq şairi qeyd edib ki, Azərbaycanın apardığı ardıcıl siyasətin önəmi var:

"İslam ölkələri, Qoşulmama Hərəkatına üzv ölkələrlə sıx əməkdaşlıq edilib. İƏT BMT-dən sonra ən böyük bir qurumdur və tərkibində 57 ölkəni birləşdirir. Məsələn, Rusiya islam ölkəsi deyil, amma 20 milyondan artıqçox müsəlman yaşayır. Bu səbəbdən də İslam Əməkdaşlıq Təşkilatının Parlament İttifaqına həmişə öz nümayəndələrini göndəriblər".

Partiya sədri bildirib ki, bu gün dəfələrlə İslam Əməkdaşlıq Təşkilatının nümayəndələri Azərbaycana gəlib:

"Təşkilatın nümayəndə heyətləri dəfələrlə Qarabağda olublar. İslam abidələrini necə dağıdıldığının şahidi olublar. Düşünürəm ki, real mənzərəni görəndən sonra Azərbaycanla əməkdaşlıq, bizə yardım meyli təşkilatda daha da güclənib. Növbəti görüşün də Bakıda keçirilməsi bunun bir əlamətidir".