Azərbaycan kakao ixracından gəlirini 3 dəfə artırıb

Bu il yanvar ayında Azərbaycan 8,662 milyon ABŞ dolları dəyərində kakao və ondan hazırlanan məhsullar idxal edib.

"Report” Dövlət Gömrük Komitəsinə istinadən xəbər verir ki, bu, 2022-ci ilin eyni dövrü ilə müqayisədə 63,7 % çoxdur.

Yanvarda Azərbaycanın kakao və ondan hazırlanan məhsullar ixracının dəyəri isə 0,445 milyon ABŞ dolları olub ki, bu da 1 il əvvələ nisbətən 2,8 dəfə çoxdur.

Bu ilin ilk ayında kakao və ondan hazırlanan məhsullar üzrə idxal Azərbaycanın ümumi idxalının 0,6 %-ni, ixrac isə ümumi ixracın 0,02 %-ni təşkil edib.

Bu ilin yanvar ayında Azərbaycan xarici ölkələrlə 3 milyard 289,5 milyon ABŞ dolları dəyərində ticarət əməliyyatı aparıb. Bu, 2022-ci ilin eyni dövrünə nisbətən 19 % azdır.

İllik xarici ticarət dövriyyəsinin 1 milyard 876,8 milyon ABŞ dolları ixracın, 1 milyard 412,7 milyon ABŞ dolları isə idxalın payına düşüb. Son 1 ildə ixrac 39,2 % az, idxal isə 44,9 % artıb.

Son nəticədə xarici ticarətdə 464 milyon ABŞ dollarlıq müsbət saldo yaranıb. Bu, illik müqayisədə 4,6 dəfə azdır.