Azərbaycan BƏƏ və Qətərə qurudulmuş gavalı ixrac etməyə başlayıb

Ötən il Azərbaycan 1,3 milyon ABŞ dolları dəyərində 520,42 ton qurudulmuş qara gavalı idxal edib.

“Report”un Dövlət Statistika Komitəsinin məlumatları əsasında apardığı hesablamalara əsasən, bu, 2022-ci ilin göstəricisindən dəyər ifadəsində 23 %, kəmiyyət olaraq – 23 % çoxdur.

Azərbaycan Moldovadan 450 min ABŞ dolları dəyərində (bir il əvvəlki göstəricidən 1,3 % azdır) 129 ton (+7 %), İrandan 376 min ABŞ dolları dəyərində (+30 %) 238 ton (+31 %), Özbəkistandan 255 min ABŞ dolları dəyərində (-0,8 %) 111 ton (-1,8 %), Çilidən 125 min ABŞ dolları dəyərində (+31 dəfə) 24,5 ton (+24 dəfə), Argentinadan 33,52 min ABŞ dolları dəyərində (+5 dəfə) 6,48 ton (+6 dəfə) qara gavalı alıb.

Hesabat dövründə Azərbaycan 8 min ABŞ dolları dəyərində (-76 %) 1,83 ton (-90 %) qurudulmuş qara gavalı ixrac edib.

Azərbaycan Rusiyaya 6,6 min ABŞ dolları dəyərində (-80 %) 1,63 ton (-91 %), Qətərə 0,74 min ABŞ dolları dəyərində 0,1 ton və Birləşmiş Ərəb Əmirliklərinə (BƏƏ) 0,63 min ABŞ dolları dəyərində 0,1 ton məhsul satıb.

Ötən il son 13 ildə (qeyd: xarici ticarət üzrə açıq istifadədə olan rəsmi statistika 2011-ci ilə kimidir) ilk dəfə olaraq BƏƏ və Qətərə tədarük həyata keçirilib.