Azərbaycan 3 ölkəyə alma şirəsi ixrac etməyə başlayıb

2023-cü ildə Azərbaycan 7,1 milyon ABŞ dolları dəyərində 5 min 108 ton alma şirəsi ixrac edib.

“Report”un Dövlət Statistika Komitəsinin məlumatları əsasında apardığı hesablamalara əsasən, bu, 2022-ci ilin göstəricisindən dəyər ifadəsində 2,7 dəfə, kəmiyyət olaraq – 2,4 dəfə çoxdur.

Hesabat dövründə Azərbaycan Rusiyaya 6,8 milyon ABŞ dolları dəyərində (bir il əvvəlki göstəricidən 3,6 dəfə çoxdur) 4 min 872 ton (+3,3 dəfə), Gürcüstana 155,25 min ABŞ dolları dəyərində (+35 %) 115 ton (+31 %), Malayziyaya 47,6 min ABŞ dolları dəyərində (+2,4 dəfə) 59,9 ton (+88 %), Qazaxıstana 31,1 min ABŞ dolları dəyərində 22,5 ton (bir il əvvəl tədarük olmayıb), Səudiyyə Ərəbistanına 19,45 min ABŞ dolları dəyərində (+70 %) 20,7 ton (+2,2 dəfə) alma şirəsi satıb.

Ötən il son 13 ildə (qeyd: xarici ticarət üzrə açıq istifadədə olan rəsmi statistika 2011-ci ilə kimidir) ilk dəfə olaraq Bruney-Darüssalama (4,9 min ABŞ dolları dəyərində 3,1 ton), Banqladeşə (2,9 min ABŞ dolları dəyərində 3,2 ton) və Cənubi Koreyaya (0,02 min ABŞ dolları dəyərində 0,02 ton) tədarük həyata keçirilib.