Yekaterina Şapoçka: Bakı qlobal şəhərlər reytinqinin siyahısına daxil edilib

Bakı inkişaf və dəyişiklik sürətinə görə qlobal statistikada yüksək nəticə göstərir.

"Report" xəbər verir ki, bunu "Boston Consulting Group" qlobal konsaltinq şirkətinin nümayəndəsi Yekaterina Şapoçka Bakıdakı Ümumdünya Şəhərsalma Forumunun 13-cü sessiyası (WUF13) çərçivəsində keçirilən "Dəyişiklik üçün tikilib: Şəhərlər gələcək uğrunda necə rəqabət aparır?" mövzusunda müzakirə zamanı deyib.

O qeyd edib ki, "Boston Consulting Group"un hazırladığı 2014-2024-cü illərdə ən sürətlə dəyişən 20 şəhər" adlı tədqiqatına əsasən, Azərbaycanın paytaxtı dördüncü kvantildə qərarlaşıb:

"Xüsusilə yaşayış şəraiti baxımından, demək olar, Bakı üçün ən yüksək kvantildədir. Bu isə şəhərin uğurlu transformasiyasını göstərir".

O əlavə edib ki, ümumilikdə, Qərb şəhərləri iqtisadi və yaşayış üçün əlverişlilik baxımından siyahıya liderlik edir:

"Yaxın Şərq, Çin və Orta Asiya şəhərləri isə ən sürətli dəyişikliklərə malikdir".