ÜST rəsmisi: Azərbaycan səhiyyənin rəqəmsallaşdırılmasında regional liderdir

Azərbaycan səhiyyənin rəqəmsallaşdırılması üzrə Qafqaz və Mərkəzi Asiya regionunda aparıcı rola malikdir.

"Report" xəbər verir ki, bunu Ümumdünya Səhiyyə Təşkilatının (ÜST) Avropa üzrə Regional direktorunun xüsusi nümayəndəsi Robb Batler "Vətəndaş sağlamlığına rəqəmsal qayğı: Tibbi Rəqəmsal Əkiz Sistemi"nin təqdimat mərasimində deyib.

Onun sözlərinə görə, Azərbaycanın rəqəmsal səhiyyə sahəsində qurduğu sistem təsadüf nəticəsində yaranmayıb:

"Bu, Səhiyyə Nazirliyinin və ölkə rəhbərliyinin hər bir vətəndaş üçün səhiyyə xidmətlərini daha effektiv etmək istiqamətində məqsədyönlü və davamlı siyasi iradəsinin nəticəsidir".

ÜST rəsmisi qeyd edib ki, Tibbi Rəqəmsal Əkiz Sistemi də müasir səhiyyənin əsas problemlərindən birini həll etməyi hədəfləyir:

"Tibbi məlumatlar çox vaxt müxtəlif qurumlar və şöbələr arasında parçalanmış vəziyyətdə olur ki, bu da həkimlərin məlumatları görmək imkanlarını, planlaşdırıcıların qərarvermə imkanlarını və xəstələrin xidmət təcrübəsini məhdudlaşdırır. Elektron sağlamlıq qeydlərini şəxsi sağlamlıq məlumatları, teleradiologiya, qəbul sistemləri və analitik alətlərlə vahid, standartlara əsaslanan platformada birləşdirməklə bu platforma daha əlaqəli, hər bir insanın ehtiyaclarına daha çevik cavab verən səhiyyə sistemi yaradır".