Le Blank: Kanada hökuməti mənzil əlçatanlığını artırmaq üçün islahatları gücləndirir

Kanadanın yeni Baş naziri Mark Karninin hökuməti bütün ölkədə mənzil əlçatanlığını artırmaq üçün şəhərsalma planlaşdırması və tənzimləmə sahəsində islahatları gücləndirir.

"Report" xəbər verir ki, bu barədə Kanadanın Mənzil İnşaatı, İnfrastruktur və İcmalar Nazirliyinin nümayəndəsi Mark Le Blank Bakıda keçirilən Ümumdünya Şəhərsalma Forumunun 13-cü sessiyasında (WUF13) bildirib.

Onun sözlərinə görə, ötən il seçilmiş Karninin hökuməti bütün Kanadada mənzil vəziyyətini yaxşılaşdırmağa yönəlmiş yerli planlaşdırma sahəsində iddialı islahatlar proqramını həyata keçirir.

Əsas alətlərdən biri 4,4 milyard dollar həcmində olan "Housing Accelerator Fund" proqramı olub: "O, artıq təxminən 112 min yaşayış vahidinin tikintisinə icazə almağa imkan verib".

Nazirlik nümayəndəsi vurğulayıb ki, proqramın xüsusiyyəti ondan ibarətdir ki, vəsaitlər birbaşa ayrı-ayrı yaşayış vahidlərinin tikintisinə yönəldilmir: "Bunun əvəzinə, maliyyələşdirməni sistemli islahatlar aparmaq üçün bələdiyyələr alırlar".

O əlavə edib ki, müsabiqə seçimi çərçivəsində bələdiyyələr öz fəaliyyət planlarını təqdim edir və islahatların aparılması üzrə öhdəliklər götürürlər ki, bu da tədbirləri yerli ehtiyaclara və prioritetlərə uyğunlaşdırmağa imkan verir.