Kiyevdə "Lesya Ukrainka Azərbaycan mədəni məkanında" tədbiri keçirilib

Kiyevdə görkəmli ukraynalı şairə Lesya Ukrainkanın anadan olmasının 155-ci ildönümünə həsr olunmuş "Lesya Ukrainka Azərbaycan mədəni məkanında" beynəlxalq ədəbi-bədii tədbir keçirilib.

"Report" xəbər verir ki, tədbir çərçivəsində ilk dəfə olaraq Lesya Ukrainkanın mədəni irsinin Azərbaycandakı mövcudluğuna dair kompleks araşdırma təqdim edilib: Bakının Qaradağ rayonunun Lökbatan qəsəbəsində onun şərəfinə abidənin ucaldılması tarixi, eləcə də şairənin əsərlərinin Azərbaycan dilinə tərcüməsində kitab nəşrlərinin, Azərbaycan müəlliflərinin onun yaradıcılığı haqqında nəşrlərinin, məqalələrinin və araşdırmalarının icmalı.

Proqramın ayrıca hissəsini Azərbaycan Dövlət Tərcümə Mərkəzinin Ukrayna Kitab İnstitutunun dəstəyi ilə nəşr etdiyi "Meşə nəğməsi" dram-feyeriyasının Azərbaycan dilində təqdimatı təşkil edib.

"Lesya Ukrainka Azərbaycan mədəni məkanında" layihəsinin müəllifi və kuratoru, Ukrayna-Türk Mərkəzinin direktoru Marina Qonçaruk qeyd edib ki, layihə mədəni diplomatiyanın qarşılıqlı əlaqəsini və onun Ukraynaya humanitar dəstəyə təsirini nümayiş etdirir. Onun sözlərinə görə, ilk dəfə olaraq bir tədbir çərçivəsində Lesya Ukrainka fiqurunun Azərbaycanın mədəni məkanına necə inteqrasiya olunduğu və bu humanitar ölçünün Ukraynanın dəstəklənməsi üzrə real addımlara necə çevrildiyi sistemli şəkildə təqdim edilib.

Söhbət, xüsusilə, mədəni diplomatiyanın Azərbaycanın Ukrayna şəhərlərinin və sosial infrastrukturun bərpasına yönəlmiş humanitar yardımına təsirindən gedir.

"Hələ 2003-cü ildə Ukrayna şəhəri İrpen və Bakının Qaradağ rayonunun Lökbatan qəsəbəsi əməkdaşlıq haqqında memorandum imzalamış, artıq 2004-cü ildə Lökbatanda Lesya Ukrainkaya və İrpendə görkəmli oftalmoloq həkim, akademik Zərifə Əliyevaya abidə açılmışdır. Sonradan bu əməkdaşlıq praktik müstəviyə keçib - xüsusilə, Azərbaycanın humanitar yardımının İrpendə sosial obyektlərin bərpasına yönəldilməsi istiqamətində, burada artıq məktəb və xəstəxana bərpa edilib, həmçinin sosial infrastruktur obyektlərinin tikintisi üzrə bir sıra layihələr planlaşdırılıb", - Qonçaruk vurğulayıb.

Tədbirdə Ukrayna Kitab İnstitutunun direktor müavini Yelena Odinokaya iştirak edib və "Meşə nəğməsi"nin Azərbaycan dilində nəşrinin simvolik əhəmiyyətini vurğulayıb.

"Bu tərcümənin işıq üzü görməsinə şərik olmaq bizim üçün son dərəcə vacibdir. Dünya ilə məhz müraciət etdiyimiz insanların və ölkələrin dillərində danışmaq çox önəmlidir. Tərcümələr xalqlarımız arasında körpülərdir, bizi birləşdirən və başqalarının bizi necə gördüyü prizmasından özümüzü yenidən dərk etmək imkanı verən şeydir", - o bildirib.

Bədii hissə Azərbaycan xalq mədəniyyətini təmsil edən ukraynalı artistlərin ifasında xoreoqrafik və vokal nömrələri əhatə edib. İnstrumental kompozisiyalar səslənib, xüsusilə, Azərbaycanın Dövlət Himni bandurada ifa olunub.

Həmçinin tədbir çərçivəsində Mariupol Dövlət Universitetinin tələbəsi Mariya Zamayın "Lesya Ukrainka Azərbaycan mədəni məkanında" bədii kollajlar sərgisi təqdim edilib.

Tədbirdə Ukrayna Xarici İşlər Nazirliyinin nümayəndələri, mədəniyyət və incəsənət xadimləri, xarici diplomatlar və media nümayəndələri iştirak ediblər.