Diplomatiya könüllüləri Polşadakı səfirlə onlayn görüşdülər - FOTO

Azərbaycanda elan olunmuş “Könüllülər ili” çərçivəsində Azərbaycanın Xarici İşlər Nazirliyi tərəfindən bu qurumun nəzdində fəaliyyət göstərən Diplomatiya Könüllüləri üçün Azərbaycan xalqının Ümummilli lideri Heydər Əliyevin anadan olmasının 97-ci ildönümü münasibətilə Azərbaycan Respublikasının Polşa Respublikasındakı Fövqəladə və Səlahiyyətli səfiri Həsən Həsənov ilə görüş təşkil olunub.

Bu barədə “Report”a XİN-dən məlumat verilib.

Görüş zamanı səfir Həsən Həsənov Ulu Öndərin müdrik daxili və xarici siyasəti haqqında geniş bəhs edib, onun haqqında xatirələrini bölüşüb. Səfir Azərbaycan xalqının Ümummilli lideri Heydər Əliyevin təkcə Azərbaycan üçün deyil, bütün dünya üçün fenomenal bir şəxsiyyət olduğunu xüsusi olaraq vurğulayıb.

Görüşdə, əsası Ulu Öndər tərəfindən qoyulmuş və hazırda ölkə rəhbərliyi tərəfindən davam etdirilən gənclər siyasətinin əhəmiyyəti və bu xüsusda, könüllülük hərəkatının önəmi vurğulanıb və 2020-ci ilin məhz "Könüllülər ili" elan olunmasının Azərbaycan Respublikasının Prezidentinin könüllülərə verdiyi dəyərinin növbəti nümunəsi olduğu qeyd edilib.

Sonda Azərbaycan dövləti tərəfindən Azərbaycan gəncləri üçün yaradılan bütün imkanlara görə ölkə rəhbərliyi- Azərbaycan Respublikasının Prezidenti İlham Əliyevə və I Vitse-Prezidenti xanım Mehriban Əliyevaya Diplomatiya Könüllüləri adından xüsusi təşəkkür ifadə olunub.