Azərbaycan Türk ölkələrinin biznes inteqrasiyasını sürətləndirməyi təklif edib

Azərbaycan Türk Ticarət və Sənaye Palataları Birliyi (TCCI) çərçivəsində iqtisadi inteqrasiyanın dərinləşdirilməsinə dair bir sıra konkret təkliflər təqdim edib.

"Report"un Qazaxıstan bürosu xəbər verir ki, bu barədə Azərbaycan Sahibkarlar Konfederasiyasının vitse-prezidenti Vüqar Zeynalov Astanada TCCI rəhbərlərinin növbədənkənar iclasında jurnalistlərə bildirib.

Onun sözlərinə görə, əsas məsələlərdən biri Birliyin institusional inkişafıdır.

"Sədrlik etdiyimiz dövrdə biz gördük ki, qəbul edilmiş qərarlar çox vaxt ləng həyata keçirilir. Səbəblərdən biri Birliyin özünün daimi aparatının və maliyyələşməsinin olmamasıdır. Bunlar olmadan bir çox təşəbbüslər uzanır", - V. Zeynalov deyib.

O, Zəngəzur dəhlizini "ikinci vacib istiqamət" adlandırıb. Onun sözlərinə görə, Azərbaycan artıq müvafiq infrastrukturun inkişafına əhəmiyyətli vəsait yatırıb, lakin marşrutun tam fəaliyyət göstərməsi üçün türk dünyası ölkələri arasında vahid qaydaların razılaşdırılması zəruridir. Söhbət xüsusilə gömrük prosedurlarının, sertifikatlaşdırma standartlarının və tariflərin unifikasiyasından gedir.

"Əgər ölkələr ümumi standartlar barədə razılığa gəlməsələr, bu marşrutun inkişafı çətinləşəcək", - o qeyd edib.

Azərbaycan tərəfinin daha bir təklifi rəqəmsal imzaların qarşılıqlı tanınması olub.

V. Zeynalovun sözlərinə görə, bu olmadan yaradılan elektron ticarət platformaları tam həcmdə işləyə bilməyəcək.

"Əgər ölkələr bir-birinin rəqəmsal imzalarını tanımasalar, "Caravanserai" və digər rəqəmsal meydançalar kimi platformalar faktiki olaraq vitrin olaraq qalacaq. Şirkətlər arasında tamhüquqlu müqavilələrin bağlanması üçün elektron imzanın qarşılıqlı tanınması zəruridir", - o vurğulayıb.

Bundan əlavə, Azərbaycan tərəfi Türk Ticarət və Sənaye Palataları Birliyi çərçivəsində biznes mühitinin vahid indeksinin hazırlanmasını təklif edib.

V. Zeynalovun sözlərinə görə, belə bir göstərici ölkələr arasında iqtisadi inteqrasiyanın səviyyəsini ölçməyə, ayrı-ayrı istiqamətlər üzrə irəliləyişi görməyə və əməkdaşlığın kifayət qədər fəal inkişaf etmədiyi sahələri müəyyənləşdirməyə imkan verəcək.

Onun sözlərinə görə, indeksin nəticələrindən Türk Dövlətləri Təşkilatına üzv ölkələrin dövlət başçıları inteqrasiya proseslərinin səmərəliliyini qiymətləndirərkən də istifadə edə biləcəklər.