Vilayət Süleyman oğlu Eyvazov — Azərbaycan Respublikasının görkəmli dövlət və hərbi xadimi, general-polkovnik, ölkənin daxili işlər naziridir. 1968ci ildə Naxçıvan Muxtar Respublikasının Culfa rayonunda anadan olan Vilayət Eyvazov ali təhsilini Azərbaycan Respublikası Daxili İşlər Nazirliyinin Polis Akademiyasında alaraq onu 2000-ci ildə fərqlənmə diplomu ilə bitirmişdir.
Daxili işlər orqanlarında xidmətə 1994-cü ilin noyabrından başlayan Eyvazov peşəkar fəaliyyəti dövründə aşağı vəzifələrdən strukturun rəhbərliyə qədər şərəfli yol keçmişdir. O, cinayət-axtarış strukturlarında müxtəlif vəzifələrdə çalışmış, DİN-in Baş Cinayət Axtarış İdarəsində şöbə rəisinin müavini, 2001–2005-ci illərdə isə mütəşəkkil cinayətkarlıqla mübarizə sahəsində mühüm qurum olan Baş Mütəşəkkil Cinayətkarlıqla Mübarizə İdarəsinin rəis müavini və rəisi vəzifələrində uğurlu fəaliyyət göstərmişdir.
Peşəkarlığı və prinsipiallığı ilə seçilən Vilayət Eyvazov Azərbaycan Respublikası Prezidentinin 2005-ci il 14 aprel tarixli Sərəncamı ilə daxili işlər nazirinin müavini, 2016-cı ildə isə daxili işlər nazirinin birinci müavini təyin edilmişdir. 2019-cu il iyunun 20-də isə dövlət başçısının Sərəncamı ilə Azərbaycan Respublikasının Daxili İşlər Naziri təyin olunmuşdur. Ona ali hərbi rütbə — general-polkovnik rütbəsi verilmişdir. Onun rəhbərliyi dövründə daxili işlər orqanlarının maddi-texniki bazasının gücləndirilməsi, cinayətkarlığa qarşı mübarizənin effektivliyinin artırılması, ictimai asayişin və vətəndaşların təhlükəsizliyinin qorunması istiqamətində sistemli və ardıcıl tədbirlər həyata keçirilmişdir.
Azərbaycan dövlətçiliyinin qorunmasında, asayişin təmin edilməsində və cinayətkarlığa qarşı mübarizədə xidmətlərinə görə Vilayət Eyvazov ölkə rəhbərliyi tərəfindən yüksək orden və medallarla təltif olunmuşdur. O, "Azərbaycan Bayrağı" ordeni, "Vətənə xidmətə görə" ordenləri (1-ci və 2-ci dərəcəli), "İgidliyə görə" medalı, həmçinin Vətən müharibəsindəki xidmətlərinə görə "Zəfər" ordeni ilə təltif edilmişdir. Nazir fəaliyyəti ilə yanaşı, həm də idmanın inkişafına töhfə verərək Azərbaycan Atıcılıq Federasiyasının prezidenti kimi də fəaliyyət göstərir.
Bu tematik bölmədə daxili işlər naziri Vilayət Eyvazovun rəsmi fəaliyyətinə, imzaladığı qərarlara, hüquq-mühafizə orqanlarının işinə dair hesabatlara, tədbirlərə və onunla bağlı yayımlanan aktual xəbərlərə yer verilmişdir.
Bakı 29° C
