Rusiya Rumıniyanın Sankt-Peterburqdakı konsulluğunu bağlayacaq - YENİLƏNİB

Rusiya cavab tədbiri olaraq Rumıniyanın Sankt-Peterburqdakı konsulluğunu bağlamaq və Rumıniya konsulunu ölkədən çıxarmaq barədə qərar qəbul edib.

"Report" yerli mediaya istinadən xəbər verir ki, bu barədə Rusiya Xarici İşlər Nazirliyinin (XİN) məlumatında bildirilib.

"İyunun 25-də Rumıniyanın Rusiyadakı səfiri Kristian İstrate Rusiya XİN-ə çağırılıb. Ona Rumıniyanın Sankt-Peterburqdakı baş konsulunun "persona non grata" elan edilməsi və bu ölkənin orada yerləşən konsulluq idarəsinin bağlanacağı barədə nazirliyin notası təqdim edilib", - məlumatda qeyd edilib.

Qurumdan bildirilib ki, bu tədbirlər "Buxarest tərəfindən Rusiyanın Konstantsadakı Baş Konsulluğunun fəaliyyətinə verilən razılığın əsassız olaraq geri alınmasına və onun rəhbərinin "persona non grata" elan edilməsinə" cavab olub.

10:57

Rumıniyanın Moskvadakı səfiri Kristian İstrate Rusiya Xarici İşlər Nazirliyinə (XİN) çağırılıb.

"Report" Rusiya mediasına istinadən xəbər verir ki, bunu Rusiya XİN-in nümayəndəsi Mariya Zaxarova bildirib.

"Rumıniyanın Konstansa şəhərindəki Baş Konsulluğun bağlanmasına cavab olaraq görüləcək qarşılıqlı tədbirlərin elan edilməsi üçün Rumıniya səfiri XİN-ə çağırılıb," - o qeyd edib.