Türkiyəli nümayəndə: Mənzil böhranının həlli üçün bələdiyyələrarası əməkdaşlıq mütləqdir

Mənzil böhranının həlli üçün bələdiyyələrarası əməkdaşlıq mütləqdir.

"Report" xəbər verir ki, bunu Mərmərə Bələdiyyələr Birliyinin Şəhər Siyasəti Mərkəzinin direktoru İrəm Korkmaz Bakıda Ümumdünya Şəhərsalma Forumunun 13-cü sessiyası (WUF13) çərçivəsində "Mənzil təminatı şəhərləri bir araya gətirəndə: praktikada yerli əməkdaşlıq" adlı panel müzakirəsində deyib.

Onun sözlərinə görə, mövcud şəraitdə əməkdaşlıq artıq seçim deyil, zərurətə çevrilib:

"Torpaq məhdud olduqda, resurslar azaldıqda və bələdiyyələr eyni vaxtda bir neçə böhranla üzləşdikdə heç bir şəhər problemlərin öhdəsindən təkbaşına gələ bilməz".

İ.Korkmaz həmçinin bildirib ki, əməkdaşlıq praktik mexanizmlərlə müşayiət olunmalıdır:

"Bələdiyyə strukturları yerli mənzil ehtiyaclarını maliyyələşdirilə və genişləndirilə bilən həllərə çevirməkdə mühüm rol oynaya bilər".

Türkiyəli nümayəndə vurğulayıb ki, mənzil siyasəti inteqrasiya olunmuş şəhərsalma ilə birlikdə nəzərdən keçirilməlidir:

"Mənzil məsələsinə yalnız yaşayış binalarının tikintisi kimi baxmaq olmaz. Bu məsələ ictimai nəqliyyat, infrastruktur, əsas xidmətlər, məşğulluq və ictimai məkanlarla əlaqəli şəkildə planlaşdırılmalıdır".