Rusiyalı təbliğatçı Vladimir Solovyovun verilişi Ermənistanda başqa proqramla əvəzlənəcək

“Rossiya 1” telekanalının aparıcısı Vladimir Solovyovun verilişi Ermənistanda mədəniyyət və ya bədii proqramla əvəzlənəcək.

“Report” “Sputnik Armenia”ya istinadən xəbər verir ki, bunu Ermənistanın Teleradio üzrə parlament komissiyasının rəhbəri Tiqran Akopyan bildirib.

Məlumata görə, bir müddət əvvəl Ermənistan Televiziya və Radio yayımları şəbəkəsi “Vladimir Solovyovla axşam” və “Vladimir Solovyovla bazar axşamı” verilişlərinin bağlanması haqqında qərar qəbul etmişdi.

Bildirilib ki, buna səbəb həmin verilişlərdə “antierməni, anti-Ermənistan təbliğatı”nın aparılmasıdır.