Rusiya Xarkov vilayətində mülki infrastrukturu vurub, ölənlər və yaralananlar var

Rusiya ordusunun Ukraynanın Xarkov vilayətində poçt terminalını atəşə tutması nəticəsində 6 nəfər ölüb, 14 nəfər yaralanıb.

“Report” xəbər verir ki, bu barədə Xarkov Vilayət Administrasiyasının rəhbəri Oleh Sinehubov teleqramda bildirib.

“Zərərçəkənlər arasında vəziyyəti ağır olanlar da var. Həkimlər bütün lazımi yardımları göstərirlər”, - Sinehubov yazıb.

Ukrayna Prezidenti Volodimir Zelenski də teleqramda qeyd edib ki, Rusiyaya qarşı təzyiqlər artırılmalı və mülki infrastruktura yönələn həmlələrə ön xətdə əldə olunan nəticələrlə cavab verilməlidir.