Rizvan Nəbiyev: Azərbaycanın öz ərazi bütövlüyünü bərpa etməsini bütün Türk dünyası gözləyirdi

Azərbaycanın öz ərazi bütövlüyünü bərpa etməsini bütün Türk dünyası gözləyirdi.

"Report" xəbər verir ki, bunu Qeyri-Hökumət Təşkilatlarına Dövlət Dəstəyi Agentliyi Müşahidə Şurasının üzvü, Milli Məclisin deputatı Rizvan Nəbiyev "Körpü" Türkman İrsi Araşdırmaları Mərkəzi İctimai Birliyinin təşkilatçılığı, Agentliyin tərəfdaşlığı ilə keçirilən II "Türkman irsi: vətəndaş cəmiyyətlərinin həmrəyliyi" adlı forumda deyib.

Onun sözlərinə görə, Azərbaycan xalqı ilə türkmanlar bir-birinə sadəcə diplomatiya ilə bağlı deyil: "Biz bu çərçivədə mədəni əlaqələrin qarşılıqlı münasibətlərə, dostluğa verdiyi töhfəni xüsusi qeyd edə bilərik".

Deputat Azərbaycanın ərazi bütövlüyünü bərpa etdiyi zaman bütün türk dünyasının sevindiyini vurğulayıb:

"Çünki Azərbaycanın zəfərini 30 il ərzində yalnız biz yox, bütün Türk dünyası gözləyirdi".

R.Nəbiyev gələcəkdə analoji tədbirlərin Bağdad, Kərkük və Hələbdə də keçirilməsini təklif edib:

"Biz istəyirik ki, İraqda, Suriyada da belə tədbirlər təşkil edək. Şəhər seçimi qardaşlarımızdan asılıdır. Bu, Bağdad, yaxud da Kərkük ola bilər".