Özbəkistanda hoteldə üç nəfərin ölümü ilə bağlı dörd şübhəli şəxs həbs edilib

Özbəkistanda Daşkənddəki hotellərdən birində iki Rusiya vətəndaşı və bir yerli sakinin ölümü ilə əlaqədar dörd nəfər saxlanılıb.

“Report” xəbər verir ki, bu barədə yerli KİV məlumat yayıb.

Məlumata görə, hotel sahibi, santexnik və keyfiyyətsiz avadanlıq satan iki nəfər həbs edilib.

Hadisə ötən ilin oktyabrında baş verib. İlkin məlumata görə, ölüm ventilyasiya sisteminə daxil olan naməlum qazdan zəhərlənmə nəticəsində baş verib.

Faktla bağlı Özbəkistan Cinayət Məcəlləsinin 186-cı maddəsinin 4-cü hissəsinin "a" bəndi (təhlükəsizlik tələblərinə cavab verməyən işlərin görülməsi və ya xidmətlərin göstərilməsi) ilə cinayət işi açılıb.