​İran generalı ölkəsinin Suriyadakı hərbi fəaliyyəti ilə bağlı açıqlama verib

Bakı. 28 oktyabr. REPORT.AZ/ "İranın hərbi məsləhətçiləri Suriyada dörd sahədə - strateji, əməliyyat, taktiki və texniki yardım  fəaliyyət göstərir".

"Report" İran KİV-inə istinadən xəbər verir ki, bunu İnqilab Keşikçiləri Qvardiyasının baş komandanı səlahiyyətlərini icra edən general-mayor Hüseyn Səlami ölkə telekanallarından birinə müsahibəsində bildirib.

O, İraq kimi Suriyanın da ölkəsi üçün mühüm və strateji ölkə olduğunu vurğulayıb: "Suriya və İraqda baş verən hadisələr İran üçün eyni mahiyyətlidir".

Qeyd edək ki, İran ordusunun Suriyadakı döyüşlərdə 21 generalı və başqa yüksək rütbəli hərbçisi həlak olduğu haqda məlumatlar yayılıb.