Gürcüstan ombudsmanı hökumətdən Novruz bayramı günü komendant saatının ləğvini xahiş edir

Gürcüstan ombudsmanı Nino Lomcariya və ona tabe olan Milli azlıqlar Şurası hökumətə müraciət ünvanlayıb.

“Report”un yerli bürosu xəbər verir ki, sənəddə Novruz bayramı ilə əlaqədar olaraq, martın 21-də komendant saatının müvəqqəti aradan qaldırılması xahiş olunur.

Qeyd edilir ki, eyni xahişlə hökumətə müraciət olunsa da, təəssüflər ki, sənəd baxılması üçün Dini Məsələlər üzrə Dövlət Agentliyinə yönəldilib, son nəticədə isə müraciətin təmin olunmasından imtina edilib:

“Novruz bayramı yaz gecə-gündüz bərabərliyi ilə üst-üstə düşür. Bu bayram Gürcüstanda uzun əsrlərdir qeyd olunur. Novruz bayramı şənlikləri etnik azərbaycanlıların yaşadıqları bələdiyyələrdə geniş şəkildə keçirilsə də, ötən il koronavirus pandemiyasına görə tətbiq olunan məhdudiyyətlər səbəbindən tam şəkildə qeyd olunmadı. Bayramın bu il də keçirilməsi təhlükə altındadır”.

Sənəddə Gürcüstanda bu ilin yanvarın 7-də Milad bayramı ilə əlaqədar məhdudiyyətlərin müvəqqəti ləğvi ilə bağlı təcrübənin olduğu, bunun epidemioloji vəziyyəti ağırlaşdırmadığı və martın 28-də keçiriləcək futbol matçı ilə bağlı da bəzi güzəştlərin planlaşdırıldığı bildirilib:

“Ümid edirik ki, Gürcüstan hökuməti etnik azlıqların dövlətin milli və dini azadlıqların reallaşdırılması baxımından vətəndaşların bərabərliyini tanıdığı hissini gücləndirməsi üçün bəzi vətəndaşların müraciətinə baxacaq və müsbət cavablandıracaq”.