“Gürcüstan Dəmir Yolu”: Ozurgeti-Tbilisi qatarında tüstülənmə nəticəsində sərnişinlər təxliyə olunub

Ozurgeti-Tbilisi reysi ilə hərəkət edən qatarın sərnişinlərinin təxliyəsinə səbəb vaqonlardan birində baş verən tüstülənmə olub.

“Report” xəbər verir ki, bu barədə "Gürcüstan Dəmir Yolu" (GDY) SC-nin məlumatında deyilir.

Tüstülənmə Şida Kartli bölgəsində Qomi-Aqara keçidində qeydə alınıb.

"Hadisə nəticəsində xəsarət alan olmayıb. Təxliyə vaxtında həyata keçirilib və bu dəqiqələrdə "Gürcüstan Dəmir Yolu" sərnişinlərin alternativ nəqliyyatla daşınması üzərində işləyir. Əlavə qatar artıq yoldadır", - məlumatda qeyd olunub.

GDY-nin məlumatına görə, tüstülənmənin səbəbi araşdırmadan sonra müəyyən ediləcək.