Ərdoğan müxalifəti tənqid edib: "İndiyədək terrorla mübarizəyə dair heç nə deməyiblər"

“Biz ölkəmizin 81 vilayəti kimi, İstanbul və Ankara şəhərlərini də sahibsiz qoymadıq”.

“Report” xəbər verir ki, bunu Türkiyə Prezidenti Rəcəb Tayyib Ərdoğan AKM-Gar-Kızılay metro xəttinin açılış mərasimində deyib.

O bildirib ki, şəhərlərin Türkiyənin 100 illiyinə hazırlanması üçün görülən işlər gecə -gündüz davam edir: “AKM-Gar-Kızılay metro xəttinin açılışı da bu baxımdan xarakterikdir. Həmçinin biz 324 yeni nəsil metro nəqliyyatı almışıq. Bu isə o deməkdir ki, biz həm də qatarların sayını və komfortu artırmışıq. Son 7 ildə Ankarada 44,5 kilometr metro xətti çəkilib”.

R.T.Ərdoğan söyləyib ki, müxalifətin son dövrlərdəki təlaşının əsas səbəbi iqtidarın həyata keçirdiyi uğurlu işlərdir: “Amma çox çalışmalıyıq. Artıq seçkilərə 35 gün qalıb. Əvvəllər CHP-ni tənqid edənlər indi bu təşkilatın sədri Kamal Kılıçdaroğlunun yanından aralı durmurlar. Bu azmış kimi, müxalifət həmçinin terrorçularla əməkdaşlıq edir”.

Türkiyə Prezidenti müxalifəti sərt tənqid edib: “Müxalifət var olanı dağıtmaq, biz isə həyata keçirdiyimiz işləri daha da inkişaf etdirmək üçün hakimiyyətə gəlirik. Hazırkı iqtidarla müxalifət arasında fərq kifayət qədər görünür. Onlar xeyirli iş, əsər, xidmət ortaya qoya bilməzlər. Nə öz gələcəyimiz, nə də uşaqlarımızın rifahının təhdid altına düşməsinə imkan verə bilmərik. Bu baxımdan mayın 14-ü əhəmiyyətlidir. Dünən seçki platformamızı xalqımızla bölüşdük. Hər zaman olduğu kimi, seçkilərə qədər də xalqımızın yanında olmağa davam edəcəyik".

O deyib ki, “yeddili masa” (Cümhuriyyət Xalq Partiyası, İYİ Partiya, Səadət Partiyası, Gələcək Partiyası, Demokrat Partiyası və Demokratiya və İnkişaf Partiyasının (DEVA) və təmsil olunduğu “Millət İttifaqı”nı və bu birliyin prezidentliyə namizədi Kamal Kılıcdaroğlunu dəstəkləyən Xalqların Demokratiyası Partiyası) indiyədək terrorla mübarizəyə dair heç nə deməyib: “Yeddili masa” üzvləri özlərindən başqa heç kimin tanımadığı separatçı təşkilatın siyasi əlaltıları ilə əməkdaşlıq edir. Həqiqətən də, ürəkağrıdan bir mənzərə ilə qarşı-qarşıyayıq. Separatçı terror təşkilatı PKK hər gün “Yeddili masa”ya dəstəyini açıqlayır. Belə bir vəziyyətdə Türkiyə vətəndaşları Kamal Kılıçdaroğluna səs verməlidirmi? Ona dəstək olmaq olarmı? FETO terror təşkilatı (Fətullahçı Terror Təşkilatı) “Yeddili masa” ilə əməkdaşlıq edir. Birlikdən heç kim terror təşkilatlarının əməllərinə reaksiya vermir. Təkcə FETO yox, bütün terror təşkilatları belədir. Hələ xaricdə müxalifətin qalib gəlməsi üçün çalışanları demirəm”.

Ərdoğan xalqa çağırış edərək bildirib ki, səsvermə prosesi məntiqli keçməlidir: "Diqqətli olun, götür-qoy edib, sonra səs verin. Nə bizə, nə də başqalarına gözüyumulu səs verməyin. Unutmayın ki, martın 14-də keçiriləcək seçkilərin nəticəsi həm də mayın 15-də necə Türkiyə görəcəyimizi müəyyənləşdirəcək".

Xatırladaq ki, mayın 14-də Türkiyədə prezident və parlament seçkiləri keçiriləcək.

Dövlət başçısı postu uğrunda 4 namizəd mübarizə aparacaq. Bunlar “Cümhur İttifaqı”nın namizədi Rəcəb Tayyib Ərdoğan, “Millət İttifaqı”nın namizədi, müxalif Cümhuriyyət Xalq Partiyasının sədri Kamal Kılıcdaroğlu, müxalif Məmləkət Partiyasının lideri Məhərrəm İncə və “Ata İttifaqı”nın namizədi Sinan Oğandır.

“Cümhur İttifaqı”na Ədalət və İnkişaf Partiyası, Milliyyətçi Hərəkat Partiyası, Böyük Birlik Partiyası, Yenidən Rifah Partiyası və Hür Dava Partiyası üzvdür.

“Millət İttifaqı”nda Cümhuriyyət Xalq Partiyası, İYİ Partiya, Səadət Partiyası, Gələcək Partiyası, Demokrat Partiyası və Demokratiya və İnkişaf Partiyası (DEVA) təmsil olunur.

“Ata” ittifaqına Zəfər, Ədalət, Ölkəm və Türkiyə İttifaq partiyaları daxildir.

Mərkəzi Seçki Komissiyasının məlumatına görə, mayın 14-də ümumilikdə 60 904 499 seçici səs verəcək.

Türkiyədən kənarda olan seçicilərin sayı isə 3 286 786 nəfərdir.

Ölkənin 81 əyalətində 195 min seçki məntəqəsi fəaliyyət göstərəcək.