Britaniyanın Tehrandakı səfiri İran XİN-ə çağırılıb

İranın Xarici İşlər Nazirliyi (XİN) Britaniya rəsmiləri tərəfindən İslam Respublikasının ünvanına səsləndirilən ittihamlarla əlaqədar Böyük Britaniyanın Tehrandakı səfiri Hüqo Şorteri çağırıb.

"Report" "Al Jazeera"ya istinadən xəbər verir ki, bu barədə İranın dövlət mediası məlumat yayıb.

Britaniya diplomatına Londonun yanaşması və İranın Britaniyanın təhlükəsizliyinə təhdid yaradan fəaliyyət həyata keçirməyə çalışdığına dair ittihamlarla bağlı Tehranın mövqeyinin əks olunduğu yazılı etiraz notası təqdim edilib.

İran XİN-in bəyanatında iddia edilib ki, bu ittihamlar məsuliyyəti başqasının üzərinə atmaq cəhdindən başqa bir şey deyil. Xüsusilə, İran tərəfi Böyük Britaniyanı ABŞ və İsraillə əlbir olmaqda ittiham edib.