İndoneziya D-8-də gələcək sədrliyinin prioritetlərini müəyyən edib

İndoneziya 2026-2027-ci illərdə D-8-ə sədrlik etməyə hazırlaşır.

"Report" xəbər verir ki, bunu İndoneziya Xarici İşlər Nazirliyinin çoxtərəfli siyasət məsələləri üzrə baş müşaviri Aqustaviano Sofyan Bakıda "Dialoqu, əməkdaşlığın və regional həmrəyliyin təşviq edilməsi" mövzusunda D-8 Media Forumunda bildirib.

Onun sözlərinə görə, İndoneziya qarşıdakı sədrliyi dövründə praktik, gələcəyə yönəlmiş və D-8-in ümumi inkişaf məqsədlərinə uyğun media əməkdaşlığını fəal şəkildə təşviq etmək niyyətindədir:

"Əminik ki, üzv ölkələrin birgə işi təşkilatın beynəlxalq arenada mövqeyini gücləndirəcək".

A.Sofyan həmçinin vurğulayıb ki, uğurlu əməkdaşlıq ortaq dəyərlər, etik standartlar və rəqəmsal innovasiyalar üzərində qurulmalıdır:

"Bu da D-8 ölkələrinə cəmiyyətin mediaya olan inamını gücləndirməyə, dayanıqlı informasiya mühiti yaratmağa və daha məlumatlı qlobal icma formalaşdırmağa imkan verəcək".