Naxçıvanda kreditləşmə 29 %-dən çox artıb

Bu ilin doqquz ayında Naxçıvan Muxtar Respublikasının bank və kredit təşkilatları tərəfindən hüquqi və fiziki şəxslərə 213 milyon 22 min 100 manat kredit verilib.

Bu barədə “Report” muxtar respublikanın Dövlət Statistika Komitəsinə istinadən xəbər verib.

Bildirilir ki, bu, ötən ilin yanvar-sentyabr ayları ilə müqayisədə 29,2 % çoxdur.

Verilmiş kreditlərin 17 milyon 554 min 800 manatı və yaxud 8,2 %-i qısamüddətli, 195 milyon 467 min 300 manatı və yaxud 91,8 %-i uzunmüddətli kreditlər olub. İllik müqayisədə qısamüddətli kreditlərin həcmi 4,3 % azalıb, uzunmüddətli kreditlərin həcmi isə 48 milyon 910 min 400 manat və ya 33,4 % artıb.