Mansur Muhtar: "İslam maliyyəsi inkişaf banklarının məhdud resurslarını tamamlayan alternativ ola bilər"

İslam maliyyəsi inkişaf banklarının məhdudiyyətli resurslarını tamamlayan etibarlı alternativ vasitəyə çevrilmək potensialına malikdir.

"Report" məlumat verir ki, bu fikirləri "Bank of Industry"nin direktorlar şurasının sədri Mansur Muhtar Bakıda keçirilən İslam İnkişaf Bankı (IsDB) Qrupunun 51-ci İllik Toplantısı çərçivəsində təşkil olunmuş "İslam Maliyyəsi üzrə 20-ci IsDB Qlobal Forumu"nda bildirib.

Onun sözlərinə görə, dünya miqyasında inkişaf landşaftında əsaslı dəyişikliklər yaşanır və bu reallıqla barışmaq zərurəti yaranıb: "Həqiqətdə, qloballaşmanın təməlini təşkil edən prinsiplər son həddə qədər sınanır. Bunlar açıq bazarlar, kapitalın azad hərəkəti və dövlətlər arası münasibətləri nizamlayan qaydalar məcmusudur. Biz bu prinsiplərə qarşı müxtəlif təzyiqlərin şahidi olduq. Bu fonda ölkələr bu gün inkişafın maliyyələşdirilməsi qurumlarından daha böyük həcmdə maliyyə resursları tələb edirlər. Ancaq bu proses güzəştli vəsaitlərin azaldığı bir dövrdə cərəyan edir. Çünki bir sıra ənənəvi donor dövlətlər fiskal çətinliklər, büdcə böhranları və rəqabət aparan tələblərlə üz-üzə qalırlar. Bazarda kapitalın dəyəri özü yüksəlib ki, bu da inkişaf bankları və inkişafın maliyyələşdirilməsi institutları üçün zəruri dəstəyin təmin edilməsini olduqca mürəkkəbləşdirir. Bizdən daha az resursla daha çox nəticə əldə etmək və bunu daha operativ şəkildə həyata keçirmək gözlənilir."

O vurğulayıb ki, bu kontekstdə həqiqətən təfəkkür tərzinin transformasiyası zəruridir: "Bizə yeni məhsullar, yeni instrumentlər, yeni tərəfdaşlıq formatları və miqyaslandırıla bilən yeni kapital qaynaqları tələb edən yeni istiqamət lazımdır. Qarşılaşdığımız çağırış məhz bundadır. Bu baxımdan hesab edirəm ki, islami sosial maliyyə etibarlı bir alternativ, əlimizdəki məhdud resursları tamamlama vasitəsi kimi çıxış edir. Hamımıza məlumdur ki, tarix boyu sədəqə və zəkat kimi alətlər müsəlman dövlətlərində səhiyyənin, təhsilin, sosial müdafiənin və hətta su təchizatı infrastrukturunun dəstəklənməsində mühüm rol oynayıb. Əgər biz idarəetmə mexanizmini modernləşdirmək, onları çağdaş maliyyə sistemləri ilə strateji şəkildə uyğunlaşdırmaq və miqyasını genişləndirmək yolunu müəyyən edə bilsək, bu real üstünlüklər təmin edəcək. Onlar dəyərlərə söykənir, cəmiyyətdə dərin köklərə malikdir və uzunmüddətli hədəflərə istiqamətlənmişdir. Bunlar mövcud resursları tamamlamaq, maliyyələşdirməni genişləndirmək, maliyyə boşluğunu aradan qaldırmaq və bu ölkələrin üzləşdiyi problemlərə cavab vermək üçün cəlb edilə bilən dəyərli kapital mənbələridir."