“Kapital Bank”ın dəstəyi ilə ADA Universitetində karyera günləri keçirilib

Bakı. 2 mart. REPORT.AZ/ “Kapital Bank” ASC-nin dəstəyi ilə fevralın 27-dən martın 2-dək ADA Universitetində karyera günləri təşkil olunub. 

Bu barədə "Report" banka istinadən xəbər verir. 

Məlumata görə, layihənin açılış mərasimində "Kapital Bank"ın İnsan Resurslarının idarə edilməsi Departamentinin direktoru Fərqanə Məmmədova da iştirak edib.

“İstedadlarla karyera yolları arasında körpü” devizi altında keçirilən yarmarkada tələbələr Azərbaycanın iş bazarındakı ən aparıcı qurumları ilə təmasda olub, dövlət və özəl sektorda insan kapitalı ehtiyacı barədə məlumatlar əldə ediblər. Tədbirdə müxtəlif sahələrdə fəaliyyət göstərən 100-dən çox şirkətin nümayəndəsi tələbə və məzunlara təqdimatlar keçirib, məşğulluq bazarı barədə gənclərdə təsəvvür yaradıb və karyerada uğur qazanma ilə bağlı məsləhətlər veriblər.

“Bu gün iş bazarında ən fəal işəgötürən olan "Kapital Bank" karyera günlərinin keçirilməsində olduqca maraqlıdır. Bu kimi layihələrə dəstək göstərməklə, biz bir tərəfdən, potensiallı kadrların birbaşa universitetlərdən cəlb olunması imkanı əldə edir, digər tərəfdən isə, öz korporativ sosial məsuliyyətimizi yerinə yetiririk”, - F.Məmmədova bildirib.

Qeyd edək ki, “Kapital Bank” bundan öncə Beynəlxalq Təhsil Sərgisi, Respublika Fənn Olimpiadası, Azərbaycan üçün öyrət, Təhsil Avtobusu, Sabah qrupları ilə layihələrdə iştirak edib, o cümlədən İqtisad Universiteti, Bakı Mühəndislik Universiteti, ADA Universiteti və digər qurumlarla əməkdaşlıq qurub. Yaxın gələcəkdə təhsillə bağlı yeni layihələrin keçirilməsi planlaşdırılır.

Azərbaycanda ən böyük filial şəbəkəsinə malik olan “Kapital Bank”, 95 filialı və 7 şöbəsi ilə müştərilərin xidmətindədir. Bankın məhsul və xidmətləri barədə daha ətraflı məlumat almaq üçün www.kapitalbank.az saytına, 196 Sorğu Mərkəzinə və yaxud Bankın müxtəlif sosial şəbəkələrdə olan səhifələrinə müraciət etmək olar.