"InvestAZ"dan dünya maliyyə bazarları ilə bağlı həftəlik analiz

Mərkəzi Bank sədrlərinin çıxışları, FOMC-un protokolları və İngiltərədə inflyasiya göstəriciləri

Ötən həftə Amerikada proqnozlaşdırıldığı kimi zəifləyən inflyasiya rəqəmləri fonunda dollar major valyutalar qarşısında dəyər itirdi. Həftəyə 105,28 bənd səviyyəsində başlayan Dollar indeksi (DXY) həftəlik şamını 104,50 bənd səviyyəsində tamamladı.

Cari həftə ərzində isə Avropa, İngiltərə, Yeni Zellandiya, İsveçrə mərkəzi bank sədrlərinin, Amerika maliyyə nazirini Cenet Yellenin çıxışları, Avropa Mərkəzi Bankının iclası və ABŞ-ın Federal Ehtiyyatlar Sisteminin Federal Açıq Bazar Komitəsinin (FOMC) son toplantısının dərc olunacaq protokolları birjalara yön verəcək. Həmçinin, Böyük Britaniyada, eləcə də, Kanadada İstehsal Qiymətləri İndeksi (PPİ) və İstehlak Qiymətləri İndeksi (CPİ) göstəriciləri açıqlanacaq.

Sədrlərin çıxışları

İnvestorlar bu həftə çərşənbə axşamı günü ABŞ maliyyə naziri Cennet Yellenin, İngiltərə Mərkəzi Bankının (BoE) sədri Endryu Beylinin çərşənbə axşamı və çərşənbə günü Avropa Mərkəzi Bankının (AMB) sədri Kristin Laqardın, cümə axşamı günü Yeni Zellandiya Mərkəzi Bankının (RBNZ) sədri Adriyan Orrun və nəhayət cümə günü İsveçrə Mərkəzi Bankının (SNB) sədri Tomas Cordanın çıxışlarında qiymət təzyiqlərinin azalıb- azalmadığına dair hər hansı bir əlamət axtaracaqlar.

Ötən həftə Amerikada inflyasiyanın zəifləməsi FED-in nəhayət senyabr ayında ilk faiz endirimini reallaşdırıcağına dair ehtimalları 75 %-ə qədər artırdıqdan sonra, bu həftə analoji addımların digər mərkəzi banklar tərəfindən nə vaxt atılacağına dair veriləcək mesajlar birjalarda tendensiyaların gedişində həlledici rol oynaya bilər. Cari həftə ərzində Amerikada dərc olunacaq mənzil bazarında satışların həcmi, işsizlik müavinəti üçün müraciətlərin sayı, Sənaye Sektorunda Biznes Aktivliyi İndeksi (Səmaye PMİ) və Xidmət Sektorunda Biznes Aktivliyi İndeksi (Xidmət PMİ) kimi önəmli iqtisadi göstəricilər investorların diqqət mərkəzində olacaq.

Bazar iştirakçıları həmçinin çərşənbə günü FOMC-un son toplantısının dərc olunacaq protokollarında Amerikada monetar siyasətin gələcəyinə dair ipucları arayacaqlar.

EUR

Ötən həftə "Big Figure" yaratması ilə yadda qalan EUR/USD məzənnəsi həftəlik şamını 1,0867 səviyyəsində tamamladı. Bu həftə Almaniyada açıqlanacaq İstehsal Qiymətləri İndeksi, ÜDM-in həcmi, eləcə də, həm Almaniyada, həm də avrozonada dərc olunacaq Sənaye Sektorunda Biznes Aktivliyi İndeksi və Xidmət Sektorunda Biznes Aktivliyi İndeksi göstəriciləri, həmçinin Avropa Mərkəzi Bankının sədri Kristin Laqardın çıxışı avronun valyuta birjalarındakı qiymətlərinə ciddi təsir edə bilər.

Böyük Britaniyadan iqtisadi rəqəmlər

Bu həftə çərşənbə axşamı İngiltərə Mərkəzi Bankının (BoE) sədri Endryu Beylinin çıxışından əlavə, çərşənbə günü İngiltərədə dərc olunacaq həm istehsal (PPİ), həm də istehlak (CPİ) qiymətlərində inflyasiya rəqəmləri, cümə axşamı açıqlanacaq Sənaye PMİ, Xidmət PMİ və Kompozit PMİ, eləcə də, cümə günü yayımlanacaq Pərakəndə Satış Dövriyyəsinin Həcmi və Pərakəndə Satış Dövriyyəsinin baza həcmi kimi vacib iqtisadi göstəricilər investorların diqqət mərkəzində olacaq.

Ötən həftəyə 1,25 ABŞ dolları səviyyəsində başlayan GBP/USD məzənnəsi həftə ərzində 2 sent bahalaşaraq həftəlik şamını 1,27 ABŞ dolları səviyyəsində tamamladı. "Buğalar" qiyməti 1,27 ABŞ dolları səviyyəsinin üzərində qoruyub saxlaya bilsələr, artım tendensiyası 1,29 ABŞ dollara kimi davam edə bilər. Lakin, İngiltərədə inflyasiya ehtimal edildiyi kimi azalarsa, BoE-nin də faiz endirimi ehtimalları güclənə bilər. Bu isə öz növbəsində funt-sterlinqin ucuzlaşmasına səbəb ola bilər.

NEFT

Ötən həftə həm "Brent" nefti, həm də "WTI" nefti təqribən 1 % bahalaşıb. ABŞ-ın yanacaq ehtiyatlarının azalması neft qiymətlərindəki artımın əsas səbibi kimi qeyd edilə bilər. Ötən həftəyə 83,1 ABŞ dolları həddindən başlayan "Brent" nefti həftəlik şamını 84,4 ABŞ dolları həddində bağladı.

Cari həftə ərzində "Buğalar" qiyməti 85 ABŞ dolları üzərinə yüksəldə və bu həddin üzərində saxlaya bilsələr, artım tendensiyası davam edə bilər. Əks təqdirdə, "Ayılar"ın diktəsi artar və qiyməti 80 ABŞ dollara kimi ucuzlaşdıra bilsələr, eniş tendensiyası daha kəskin xarakter ala bilər.

XAU/USD

Ötən həftəyə 2 360 ABŞ dolları səviyyəsindən başlayan və 2 332 ABŞ dolları səviyyəsinə kimi ucuzlaşan qızıl, açıqlanan qlobal iqtisadi göstəricilər və geosiyasi proseslər fonunda bu həddən dəstək taparaq sürətlə bahalaşdı və həftəlik şamını 2 413 ABŞ dolları səviyyəsində tamamladı. Ehtimal olunur ki, "Buğalar" qiyməti qızıl qiymətlərinin tarixi maksimumu olan 2 431 ABŞ dolları həddinin üzərində saxlaya bilsələr, artım tendensiyası daha kəskin xarakter ala bilər.

İnvestisiya ilə bağlı suallarınızı: *1234 telefon nömrəsi və ya www.investaz.az veb saytı vasitəsilə bizə ünvanlaya bilərsiniz.

"InvestAZ İnvestisiya Şirkəti"nin

Tədris və Analiz Departamenti

"InvestAZ İnvestisiya Şirkəti"nin fəaliyyətini Azərbaycan Mərkəzi Bankı tənzimləyir. Şirkət, 09.01.2016-cı il tarixli 087986 saylı lisenziyası əsasında broker, anderraytinq (diler), marja ticarəti (forex), fərdi investorların portfelinin idarə edilməsi, market meykerlik və sair investisiya xidmətləri üzrə fəaliyyət göstərir.

Risk bildirişi

Yuxarıda göstərilən məlumatlar tamamilə tövsiyə xarakterlidir. Bu fəaliyyət üzrə həyata keçirilən əməliyyatlar yüksək risk qrupuna daxildir və "InvestAZ İnvestisiya Şirkəti" yuxarıda göstərilən məlumatlar əsas götürülməklə, həyata keçirilən investisiya əməliyyatları üzrə heç bir öhdəlik daşımır.