“Finance Leasing”: İstiqrazlarımızı fiziki şəxslər alacaq

Bakı. 14 fevral. REPORT.AZ/ “Finance Leasing” ASC-nin ABŞ dolları və Azərbaycan manatı ilə dövriyyəyə buraxmağa hazırlaşdığı 1 500-ə yaxın istiqrazın artıq müştərisi var.

Bu barədə “Report”a açıqlamasında lizinq şirkətinin İdarə Heyətinin sədri Elşad Nəsibov məlumat verib.

Onun sözlərinə görə, qiymətli kağızları 10-dan artıq fiziki şəxs alacaq.

Xatırladaq ki, Maliyyə Bazarlarına Nəzarət Palatası fevralın 6-da “Finance Leasing”in 3 istiqraz emissiyasını dövlət qeydiyyatına alıb. Bu emissiyalar hər birinin nominal dəyəri 500 ABŞ dolları olan 1 227 ədəd və 86 ədəd, eləcə də hər birinin nominal dəyəri 500 manat olan 200 ədəd faizli təmin edilməmiş istiqrazın buraxılışını nəzərdə tutur. İlk emissiya üzrə illik gəlirlilik 9%, 2-ci və 3-cü emissiya üzrə isə 14%-dir. Tədavül müddəti 1 080 gün olan qiymətli kağızlar qapalı üsulla yerləşdiriləcək. Prosesin anderrayteri "Kapital Menecment" investisiya şirkətidir. 

E.Nəsibov onu da qeyd edib ki, rəhbərlik etdiyi şirkət hüquqi şəxslər üçün də istiqraz buraxmağı planlaşdırır: “Hazırda sığorta və investisiya şirkətləri ilə bu istiqamətdə danışıqlar gedir”.

Xatırladaq ki, "Finance Leasing" 2007-ci ilin may ayından fəaliyyət göstərir, "Finex Group"a daxildir. Onun nizamnamə kapitalı 1,2 mln. manatdır. Şirkətin səhmləri 14 fiziki şəxsə, o cümlədən 19%-i Tokay Murad oğlu Şıxəlizadəyə, 13,1%-i Murğuz Elşən oğlu Tağıyevə, 12%-i Ramiz İbrahim oğlu İbrahimova, 12,7%-i Azad Malik oğlu Cavadova, 10%-i Mobil Famil oğlu Şərifova, 3,2%-i Azad Nəriman oğlu Cəbrayılova, qalan 30%-i isə digər 8 səhmdara məxsusdur. Lizinq şirkəti "Finex Group"da təmsil olunan "Finex Credit" ASC bank olmayan kredit təşkilatının səhmlərinin 73,3%-nə nəzarət edir.