EBRD Afrikanın altı dövləti ilə əməkdaşlıq planlarını açıqlayıb

Avropa Yenidənqurma və İnkişaf Bankı (EBRD) Afrika qitəsində öz mövcudluğunu əhəmiyyətli dərəcədə genişləndirmək niyyətindədir.

"Report" xəbər verir ki, bunu EBRD-nin gender bərabərliyi və iqtisadi inklüzivlik üzrə rəhbəri Pavel Krasnı (Pawel Krasny) Bakıda Ümumdünya Şəhərsalma Forumunun 13-cü sessiyası (WUF13) çərçivəsində keçirilən "Qlobal Cənubda məhsuldar tərəfdaşlıqları təşviq edən inşaatçılar koalisiyası və CAHF Mənzil Maliyyələşdirilməsi 2025/2026 nəşrinin ilkin təqdimatı" adlı panel sessiyada bəyan edib.

P.Krasnı qeyd edib ki, əvvəlcə postsovet dövlətlərinin bazar iqtisadiyyatına keçidinə yardım məqsədilə təsis edilmiş maliyyə institutu fəaliyyətinin coğrafi əhatə dairəsini mərhələli şəkildə genişləndirir.

"EBRD altı yeni dövlətdə işə başlamağa hazırlaşır, onlardan üçü fransızdilli Afrikada yerləşir. Hazırda Seneqal, Kot-d'İvuar və Beninlə danışıqlar aparırıq, həmçinin Nigeriya, Keniya və Qana ilə əməkdaşlıq məsələləri üzərində işləyirik. Sürətlə inkişaf edən bu bazarlarda fəaliyyətin genişləndirilməsi bizə mövcud təcrübədən inklüziv iqtisadi inkişafa yardım göstərmək, kiçik sahibkarlığı dəstəkləmək və regionda gender bərabərliyini təşviq etmək imkanı verəcək", - P.Krasnı vurğulayıb.