Dünya Bankı Rusiya iqtisadiyyatı üzrə artım proqnozunu azaldıb

Bakı. 23 may. REPORT.AZ/ Rusiyada bu il iqtisadi artım tempinin 1,3% təşkil edəcəyi gözlənilir. 

"Report" "Rambler News Service"ə istinadən xəbər verir ki, bu barədə Dünya Bankının (DB) "Rusiya iqtisadiyyatı: durğunluqdan canlanmaya doğru" adlı hesabatında məlumat verilib. Qeyd edək ki, daha əvvəlki hesabatda bank Rusiya iqtisadiyyatının bu il 1,5% artacağını proqnozlaşdırırdı.

DB-nın proqnozlarına görə, neft qiymətləri cari səviyyədən 15% azalarsa bu il Rusiyada iqtisadi artım 1% olacaq. 2018-2019-cu illərdə isə artım 1,2% təşkil edəcək. Əgər neftin qiyməti 15% artarsa, o zaman ÜDM bu il 1,6%, 2018-2019-cu illərdə isə 1,8% artacaq.

Bankın ekspertləri Rusiya iqtisadiyyatının neftin qiymətindən asılılığının davam edəcəyini bildiriblər.