Samir Şərifov: "BYİB-dəki kapital artımına elə də çox xərcimiz çıxmayacaq"

“Azərbaycan Dünya Bankı qrupuna daxil olan Beynəlxalq Yenidənqurma və İnkişaf Bankının (BYİB) kapital artımında iştirak etməyə elə də çox xərc çəkməyəcək". 

"Report" xəbər verir ki, bunu jurnalistlərə açıqlamasında maliyyə naziri Samir Şərifov deyib. 

"Bankın Müşahidə Şurası vaxtaşırı kapital artımı ilə bağlı qərar qəbul edir. Sonuncu bu cür qərar ötən il qəbul edilib. Qərara əsasən, üzv ölkələr yeni səhmlərə abunə yazılmalıdır. Hansısa ölkə bunu etmirsə onun payı digər iştirakçılar arasında bölünür. Azərbaycanın BYİB-dəki səsvermə hüququnun indiki səviyyədə saxlanılması üçün ölkə prezidenti tərəfindən müvafiq qərarlar qəbul edilib, mənə və ədliyyə nazirinə səlahiyyətlər verilib. Bu kapital artımına elə də çox xərcimiz çıxmayacaq. İlk növbədə bu vəsait uzun illər ərzində ödənilir. Yəni, beynəlxalq maliyyə qurumunda yeni səhmlərə abunə yazılışı iki üsulla həyata keçirilir. Bu üsullardan biri odur ki, vəsaitin təxminən 10%-i ödənilir, digər hissəsi üzrə isə veksillər əldə olunur, yəni pul nağd şəkildə ödənilmir və lazım gəldikdə bankın digər üzvləri həmin vəsaiti təmin edə bilər. Odur ki, üzərimizə böyük maliyyə yükü düşmür", - nazir qeyd edib.