Azərbaycan Qazaxıstanla maliyyə sektorunda süni intellektdən istifafə imkanlarını müzakirə edib

Azərbaycan Mərkəzi Bankının (AMB( sədr müavini Toğrul Əliyevin rəhbərlik etdiyi nümayəndə heyəti Qazaxıstanın Maliyyə Bazarının Tənzimlənməsi və İnkişafı Agentliyində işgüzar səfərdə olub.

"Report" bu barədə AMB-yə istinadən xəbər verir.

Məlumata görə, səfər çərçivəsində Agentliyin sədri Mədinə Abılkasımova və qurumun məsul rəhbər şəxsləri ilə görüş keçirilib. Görüşdə kredit təşkilatlarının fəaliyyətinin tənzimlənməsi və nəzarətinə dair mövzular ətrafında geniş fikir mübadiləsi aparılaraq bu istiqamətdə qurumlararası birgə əməkdaşlıq məsələlərinin əhəmiyyəti və səmərəsi vurğulanıb.

İki qurumun nümayəndələri arasında keçirilmiş çoxsaylı işgüzar görüşlərdə risk əsaslı nəzarətin əsas elementlərindən olan nəzarət baxışı və qiymətləndirmə prosesi (SREP), aktivlərin keyfiyyətinin qiymətləndirilməsi, stres-testləşdirmə və model risklərinin idarə edilməsi kimi mövzular müzakirə olunub, qeyd olunan alətlərin səmərəli tətbiqi üçün süni intellekt və nəzarət texnologiyalarından (SupTech) istifadə imkanlarına dair fikir mübadiləsi aparılıb.