Azərbaycan bankı səhmdarlarına 125 milyon manat dividend ödəyəcək

"Azərbaycan Beynəlxalq Bankı" ASC səhmdarlarına ötənilki mənfəətindən 125 milyon manat dividend ödəyəcək.

Bu barədə "Report"a Bankdan bildirilib.

Məlumata görə, bununla bağlı qərar ABB-nin səhmdarlarının iyunun 30-da keçirilmiş ənənəvi ümumi yığıncağında qəbul edilib. Yığıncaqda Bankın kənar auditor unun təsdiqlədiyi və Audit Komitəsinin tövsiyyə etdiyi 2021-ci il üzrə maliyyə hesabatı təsdiq edilib, eləcə də kredit təşkilatının geri çağırılmış səhmlərinin ləğvi edilməsi məsələsinə baxılıb və bununla bağlı qərar qəbul edilib.

Xatırladaq ki, ABB 1992-ci ildə yaradılıb. Onun nizamnamə kapitalı 1 241,287 milyon manatdır. Bankın səhmlərinin 91,4%-i Maliyyə Nazirliyinə, 3,76%-i İqtisadiyyat Nazirliyi yanında Əmlak Məsələləri Dövlət Xidmətinə, 0,23%-i “Aqrarkredit” QSC bank olmayan kredit təşkilatına, 4,61%-i isə fiziki və hüquqi şəxslərə məxsusdur.