ARDNF investisiyalarını Afrikadan geri çəkib

Bu ilin üçüncü rübündə Azərbaycan Dövlət Neft Fondu (ARDNF) investisiyalarını Afrika qitəsindən geri çəkib.

"Report" bu barədə Fonda istinadən xəbər verir.

İkinci rübün yekununa bu investisiyalar ARDNF-in portfelində 0,1 % (təqribən 45 milyon ABŞ dolları) təşkil edib.

Məlumata görə, bu ilin yanvar-sentyabr ayları ərzində Neft Fondunun investisiyalarında Avropa ölkələrinin payı 29,2 %, Asiya-Sakit Okean regionu ölkələrinin payı 20,2 % olub.

Bu rəqəmlər 2021-ci ilin 9 ayı ilə müqayisədə müvafiq olaraq 30,02 % və 21,23 % təşkil edib.

Digər regionlardan Şimali Amerikanın payı 26,71 %-dən 30,7 %-ə, Avstraliya və Yeni Zelandiyanın payı 1 %-dan 0,8 %-ə, Yaxın Şərq regionunun payı 0,68 %-dən 0,4 %-ə, Cənubi Amerika regionunun payı 0,04 %-dən 0,1 %-nə qədər dəyişib.

Bu ilin yanvar-sentyabr ayları ərzində ARDNF-in investisiyalarında inkişaf etmiş ölkələrin payı 59,86 %-dən 61,1%-ə qalxıb.

Bu müddət ərzində inkişaf etməkdə olan ölkələrin payı isə 19,82 %-dən 20,3 %-ə qalxıb, beynəlxalq maliyyə təşkilatlarının payı isə 7,51 %-dən 6,6 %-yə azalıb.