ARDNF-in investisiya portfelində dolların payı 70 %-ə yaxınlaşıb

Bu il iyulun 1-nə Azərbaycan Dövlət Neft Fondunun (ARDNF) investisiya portfelinin dəyəri 72 milyard 595,1 milyon ABŞ dolları təşkil edib.

Bu barədə "Report" Fonda istinadən xəbər verir.

Məlumata görə, bu, ötən il iyulun 1-i ilə müqayisədə 6 milyard 079,9 milyon ABŞ dolları və yaxud 9,1 % çoxdur.

Məlumata görə, hazırda ARDNF-in investisiyalarının 69,7 %-i (50 milyard 566,1 milyon) ABŞ dollarındadır. Bu isə 1 il əvvələ nisbətən 3,2 faiz bəndi çoxdur.

Əvəzində investisiya portfelində avronun payı 3,2 faiz bəndi azalaraq 17,7 %-ə (11 milyard 279,8 milyon) düşüb.

Hesabat dövründə portfeldə ingilis funt sterlinqinin payı 0,2 faiz bəndi azalaraq 4,9 % (2 milyard 690 milyon), Çin yuanının payı 0,1 faiz bəndi azalaraq 2,3 % (11 milyard 570,7 milyon), yapon yeninin payı 0,1 faiz bəndi artaraq 1,5 % (174 milyon 308,7 min), digər xarici valyutaların payı isə 0,2 faiz bəndi artaraq 3,9 % (2 milyard 844,9 milyon dollar ekvivalentində) təşkil edib.

Bu il iyulun 1-nə ARDNF-in aktivləri isə 72 milyard 596 milyon ABŞ dolları olub ki, bu da 1 il əvvələ nisbətən 9,1 % çoxdur.