ADB 2030-cu ilə qədər ilk strateji biznes icmalını təsdiqləyib

Asiya İnkişaf Bankı (ADB) 2027–2029-cu illər ərzində 104,5 milyard ABŞ dolları məbləğində maliyyə öhdəliklərini, həmçinin Asiya-Sakit okean regionunda layihələrin hazırlanması və icrası keyfiyyətinin yüksəldilməsinə yönəlmiş kompleks islahatlar proqramını nəzərdə tutan tarixində ilk strateji biznes icmalını təsdiqləyib.

"Report" ADB-yə istinadən xəbər verir ki, qəbul edilmiş sənəd ilk dəfə olaraq strateji, əməliyyat, kadr və maliyyə planlaşdırmasını vahid strukturda birləşdirir və bu da iqtisadi qeyri-sabitlik, iqlim təhdidləri və texnoloji transformasiya fonunda iştirakçı dövlətlərin ehtiyaclarına reaksiyanın operativliyini artırmaq məqsədi daşıyır.

"Əvvəlki planlaşdırma sistemimizi təkmilləşdirərək, bu icmal strategiyanı, əməliyyatları, kadr resurslarını və maliyyə planlaşdırmasını ADB-nin banka üzv ölkələrin ehtiyaclarına daha operativ və adaptiv şəkildə cavab verməsinə imkan yaradan bütöv bir mexanizmdə birləşdirir", - məlumatda ADB prezidenti Masato Kandanın sözlərindən sitat gətirilib.

Biznes icmalının baza ssenarisinə əsasən, 81,6 milyard ABŞ dolları suveren əməliyyatlara (hökumətlərə dəstək), 22,8 milyard ABŞ dolları isə qeyri-suveren əməliyyatlara (özəl sektora dəstək) yönəldiləcək. Yenilənmiş strategiyaya uyğun olaraq, ADB səylərini layihələrin icraya hazırlığına, risklərin idarə edilməsinə və ilk növbədə məhdud resurs potensialı olan dövlətlərdə regional iştirakın genişləndirilməsinə cəmləşdirməyi planlaşdırır. Bundan başqa, bank özəl kapitalın səfərbər edilməsini gücləndirmək, həmçinin dövlət və özəl sektorlar arasında qarşılıqlı əlaqəni dərinləşdirmək niyyətindədir.

Bundan başqa, yoxsulluqla mübarizə, inkişaf etməkdə olan ada dövlətlərinə və münaqişə şəraitində olan ölkələrə dəstək, ərzaq, su və enerji təhlükəsizliyinin təmin edilməsi, habelə yeni sahələrin, o cümlədən strateji əhəmiyyətli mineral resursların emalına kömək göstərilməsi əvvəlkitək maliyyələşdirmənin əsas istiqamətləri olaraq qalacaq.

Qəbul edilmiş sənəd ADB-nin 2029-cu ilədək (həmin il daxil olmaqla) fəaliyyətinin ümumi istiqamətini müəyyən edir, konkret maliyyə təşəbbüsləri və büdcə qərarları isə ayrı-ayrı nəzərdən keçirilmə və təsdiqlənmə prosedurlarından keçəcək.

Xatırladaq ki, ADB 1966-cı ildə yaradılıb. 69 səhmdar ölkə, o cümlədən Asiya-Sakit okean regionunun 50 dövləti bankın üzvüdür.