Qızıl Avropa Liqası: Azərbaycan millisi son oyununa çıxacaq

Qadın voleybolçulardan ibarət Azərbaycan millisi bu gün Qızıl Avropa Liqasında son oyununu keçirəcək.

"Report"un məlumatına görə, Faiq Qarayevin baş məşqçisi olduğu yığma Bakıda Avstriya ilə üz-üzə gələcək.

Gənclər və İdman Nazirliyinin Voleybol Mərkəzində gerçəkləşəcək qarşılaşma saat 17:00-da start götürəcək.

Qeyd edək ki, əvvəlki beş oyunda iki qələbə qazanan Azərbaycan millisi 6 xalla 12 komanda arasında 8-ci pillədə qərarlaşıb. Sonuncu sıradakı Avstriyanın isə xalı yoxdur.