UN-Habitat: Mənzil təminatı şəhəri təhlükəsizliyi və iqlim dayanıqlılığı ilə birgə olmalıdır

Mənzil təminatı şəhər təhlükəsizliyi və iqlim dayanıqlılığı ilə birgə nəzərdən keçirilməlidir.

"Report" xəbər verir ki, bunu BMT-nin Məskunlaşma Proqramının (UN-Habitat) Asiya və Sakit Okean regionu üzrə regional direktoru Kazuko İşiqaki Bakıda keçirilən Ümumdünya Şəhərsalma Forumunun 13-cü sessiyası (WUF13) çərçivəsində təşkil olunmuş "İnteqrasiya olunmuş Şəhər Həlləri və Mənzil üçün İnsan Təhlükəsizliyindən İstifadə - BMT-nin Birgə Fəaliyyətindən Dərslər" adlı tədbirdə bildirib.

"Biz mənzil təminatını şəhər təhlükəsizliyi, əsas xidmətlər, iqlimə davamlılıq və inklüziv idarəetmə ilə getdikcə daha çox əlaqələndiririk. Çünki bir sahədə tərəqqinin digər sahələrdəki tərəqqidən asılı olduğunu qəbul edirik. Və ən əsası, bu, heç bir agentliyin təkbaşına icra edə biləcəyi bir iş deyil. Bu, şəhərləri daha ardıcıl şəkildə dəstəkləmək üçün mandatları, təcrübəni və yerlərdəki iştirakı bir araya gətirən "Vahid BMT" əməkdaşlığından asılıdır. ​Asiya-Sakit Okean regionunda Kamboca bu yanaşmanın praktiki tətbiqinə dair belə nümunələrdən birini təqdim edir. Orada BMT-nin İnsan Təhlükəsizliyi üzrə Etimad Fondu və digər BMT agentlikləri ilə tərəfdaşlıq çərçivəsində mənzil təminatı xüsusilə çoxsaylı və üst-üstə düşən həssaslıqlarla üzləşən icmalar üçün xidmətləri gücləndirmək, təhlükəsizliyi artırmaq, yerli idarəetməni dəstəkləmək üçün bir tramplin rolunu oynayıb. İş yerli reallıqlardan başladı, icmalar və bələdiyyələrlə sıx tərəfdaşlıq quruldu və mənzil şəraitinin yaxşılaşdırılması daha geniş davamlılıq və inklüzivlik sisteminə bağlandı", - deyə o qeyd edib.