UN-Habitat: 120-dən çox maraqlı tərəf tərəqqi barədə xüsusi rəyini bildirib

BMT-nin Məskunlaşma Proqramının (UN-Habitat) aralıq icmal prosesində 120-dən çox maraqlı tərəf tərəqqi barədə öz xüsusi rəylərini bildirib.

"Report" xəbər verir ki, bunu UN-Habitat-ın Bilik və İnnovasiya şöbəsinin rəhbəri Edlam Abera Bakıda keçirilən Ümumdünya Şəhərsalma Forumunun 13-cü sessiyası (WUF13) çərçivəsində təşkil olunmuş "Yeni Şəhərsalma Gündəliyi (NUA) üzrə növbəti 10 il üçün birgə səylərimiz" adlı tədbirdə deyib.

"Milli hesabatlara əlavə olaraq, dünya miqyasında maraqlı tərəflər və digər aktorlarla əlaqə qurduğumuz üçün qlobal miqyasda inklüziv bir prosesimiz olub. Bu aralıq icmal prosesində 20-dən çox BMT qurumu iştirak edib. 120-dən çox maraqlı tərəf tərəqqi barədə öz xüsusi rəylərini bildirib və biz çoxlu sayda söhbətlər apardıq. Vebinarlarımız, müzakirələrimiz olub və onlar verdikləri töhfələr baxımından son dərəcə canlı keçib", - o qeyd edib.

Şöbə rəhbərinin sözlərinə görə, həmçinin Yeni Şəhərsalma Gündəliyi ilə bağlı potensialın artırılmasına yönəlmiş sessiyalar təşkil edilib və orada bütün maraqlı tərəfləri təmsil edən minlərlə iştirakçı var idi: "Beləliklə, Yeni Şəhərsalma Gündəliyi üçün bu çox vacib məqamda tərəqqinin qiymətləndirilməsinin inklüziv olmasını və bu gündəlikdə marağı olan hər kəsin perspektivlərini və səslərini əks etdirməsini təmin etmək üçün bu prosesi həyata keçirdik".